పుతిన్ ను 'ఎస్-500' వ్యవస్థ కోసం అడగాలి.. ఇండియాకు సూచించిన భారత సంతతి రష్యన్ ఎం.ఎల్.ఏ

రష్యా అధ్యక్షుడు వ్లాదిమిర్ పుతిన్ భారత పర్యటనకు రానున్న వేళ, ఆయన పార్టీకి చెందిన భారత సంతతి చట్టసభ సభ్యుడు (MLA) అభయ్ సింగ్ కీలక వ్యాఖ్యలు చేశారు. భారత్ అత్యాధునిక ఎస్-500 వాయు రక్షణ వ్యవస్థ కోసం రష్యాపై ఒత్తిడి తేవాలని ఆయన సూచించారు. నేటి నుంచి ఢిల్లీలో 23వ భారత్-రష్యా వార్షిక శిఖరాగ్ర సదస్సు జరగనున్న నేపథ్యంలో ఈ పరిణామం ప్రాధాన్యం సంతరించుకుంది.

పాట్నాలో జన్మించిన అభయ్ సింగ్ ప్రస్తుతం ఉక్రెయిన్ సరిహద్దులోని కుర్స్క్ ప్రాంతానికి శాసనసభ్యుడిగా ప్రాతినిధ్యం వహిస్తున్నారు. తాజాగా ఆయన ‘ఇండియా టుడే టీవీ’తో మాట్లాడుతూ "భారత్ వద్ద ఉన్న ఎస్-400 చాలా మంచి క్షిపణి వ్యవస్థ. కానీ ఎస్-500 అనేది అత్యాధునిక టెక్నాలజీ. ప్రస్తుతం రష్యా మాత్రమే దీన్ని ఉపయోగిస్తోంది. ఒకవేళ సరఫరా చేయడానికి రష్యా అంగీకరిస్తే, ఈ వ్యవస్థను పొందిన తొలి దేశం ఇండియానే అవుతుంది. చైనాకు కూడా ఈ టెక్నాలజీ లేదు. ఇది భారత్‌కు గొప్ప విజయం అవుతుంది" అని వివరించారు.

కాగా, నాలుగేళ్ల విరామం తర్వాత పుతిన్ భారత్‌లో పర్యటిస్తున్నారు. ఉక్రెయిన్ యుద్ధం, రష్యా నుంచి భారత్ రాయితీపై ముడిచమురు కొనుగోళ్లు వంటి అంతర్జాతీయ పరిణామాల నేపథ్యంలో ఈ పర్యటనపై సర్వత్ర ఆసక్తి నెలకొంది. ఈ సదస్సులో రక్షణ సహకారం, వాణిజ్యం, అణు ప్రాజెక్టులు, సాంకేతిక మార్పిడి, వ్యవసాయం వంటి అంశాలపై చర్చలు జరగనున్నాయి.

ఈ పర్యటనలో సుఖోయ్-57 యుద్ధ విమానాలు, భారతీయులకు రష్యాలో వర్క్ పర్మిట్లు వంటి అంశాలు కూడా చర్చకు వచ్చే అవకాశం ఉందని అభయ్ సింగ్ తెలిపారు. పశ్చిమ దేశాలు భారతీయులకు నిబంధనలు కఠినతరం చేస్తున్నాయని, కానీ రష్యాలో నైపుణ్యం ఉన్న కార్మికుల కొరత ఉందని, భారతీయులు ఈ అవకాశాలను అందిపుచ్చుకోవాలని ఆయన పిలుపునిచ్చారు. పుతిన్ పర్యటన ఇరు దేశాల మధ్య వ్యూహాత్మక భాగస్వామ్యాన్ని మరింత బలోపేతం చేస్తుందని ఆయన ఆశాభావం వ్యక్తం చేశారు.